الشروط والأحكام
آخر تحديث: 22 نوفمبر 2026
باستخدامك لفزعة توافق على هذي الشروط.
مقدم الخدمة: مؤسسة نابيكس لتقنية المعلومات، الرقم الوطني الموحد 7055611177، في المملكة العربية السعودية. و«فزعة» علامة تجارية للمؤسسة.
الخدمة
فزعة مساعد يعتمد على الذكاء الاصطناعي:
- للأفراد: مساعد خاص على تيليجرام وفي تطبيق فزعة، يسجل مواعيدك ومناسباتك ويذكرك فيها، ويرتب يومك، ويساعدك تكتب رسايلك، ويرتبط ببرامجك لو ربطتها.
- للمؤسسات والشركات: مساعد يرد على عملاء المشروع في واتساب ويحجز لهم، ومساعد لصاحب المشروع يتابع شغله ويرسل له التقارير.
فزعة ممكن يغلط أحياناً، فراجع المواعيد والأمور المهمة بنفسك ولا تعتمد عليه لحاله في الأمور الحرجة.
اللي ما يقدمه
فزعة ما يقدم استشارات طبية أو قانونية أو مالية. لهالأمور ارجع لمختص.
الاستخدام المقبول
- ما تستخدمه لأي شي مخالف للأنظمة أو يضر غيرك.
- المساعد ما يرسل شي باسمك إلا بموافقتك، وأنت مسؤول عن الرسائل اللي توافق عليها.
- لما تربط برامجك (مثل Notion أو تقويمك أو بريدك)، استخدامك لها يخضع كمان لشروط أصحابها، وتقدر تفك الربط متى ما بغيت.
- الاشتراك السنوي له حد استخدام عادل بالشهر.
- صاحب المشروع مسؤول عن صحة معلومات مشروعه اللي يرد بها فزعة على العملاء، مثل الأسعار والأوقات والعروض.
الصور
- لو طلبت من فزعة يسوي صورة أو يعدّل صورة، أنت مسؤول عن الطلب وعن الصور اللي ترسلها: لازم تكون لك أو عندك إذن تستخدمها.
- ممنوع تطلب صور جنسية أو عنيفة، أو وثائق وهويات وفواتير مزورة، أو صورة لشخص حقيقي بشكل يضره أو يضلل الناس، أو تشيل علامة مائية من صورة مو لك.
- الصور تنسويها أدوات ذكاء اصطناعي، وممكن ما تطلع مثل ما تتوقع. وتقدر تستخدم الصور اللي سوّاها لك فزعة في أغراضك الشخصية والتجارية، بشرط ما تخالف الأنظمة ولا حقوق غيرك.
المواقع (برايم وإيليت)
- الموقع اللي يسويه لك فزعة ينشر باسمك، وأنت مسؤول عن كل اللي فيه: المعلومات والأسعار والصور وأرقام التواصل.
- ممنوع تستخدمه في احتيال، أو انتحال شخصية أو جهة، أو بيع شي ممنوع، أو جمع بيانات الناس بدون علمهم.
- نقدر نوقف أو نحذف أي موقع يخالف هالشروط أو يبلّغ عنه أحد ويثبت إنه مخالف، بدون إنذار.
- عدد المواقع في كل باقة يحسب كل موقع صممه لك فزعة. لو حذفت موقع يبقى محسوب من الحد، وما تقدر تسوي موقع بداله. وتقدر تعدّل مواقعك الموجودة وقت ما تبي من «حسابي» ← «مواقعي» أو بالكلام مع فزعة.
- رابط الموقع ممكن يتغيّر لو نقلنا المواقع لمكان ثاني، ونبلغك قبلها. ولو تبي دومين باسمك، تشتريه بنفسك ويكون ملكك ومسؤوليتك.
الباقات والأسعار
الأفراد:
- الباقة المجانية دائمة: 100 رسالة و10 مواعيد وتذكيرات جديدة بالشهر، و3 صور، و70 رد بالمكالمة الصوتية، وموظفين في طاقم عملك، وموقع واحد لمشروعك. إذا وصلت الحد، تذكيراتك المسجلة توصلك في وقتها، وتكمل أول الشهر الجاي.
- برايم السنوي: 199.99 ريال. 300 رسالة بالشهر، وتذكيرات بلا حد، و20 صورة بالشهر، و4 في طاقم عملك، وموقعين لمشروعك (20 صورة بالشهر).
- إيليت السنوي: 299.99 ريال. كل اللي في برايم، و600 رسالة بالشهر لك وللشخص اللي من أهلك مع بعض، و40 صورة بالشهر، و10 في طاقم عملك، و3 مواقع (40 صورة بالشهر).
- الاشتراك الشهري (قريباً): برايم 29.99 ريال بالشهر، وإيليت 59.99 ريال بالشهر، بنفس مزايا السنوي. يتجدد تلقائياً كل شهر إلى أن تلغيه من إعدادات اشتراكات أبل أو قوقل.
- ادعُ صاحبك: كل 3 أشخاص يبدون يستخدمون فزعة من رابطك يعطونك 30 يوم برايم. نقدر نلغي الأيام اللي تنكسب بطريقة غير صحيحة، مثل الحسابات الوهمية.
- لما ينتهي اشتراكك ترجع للباقة المجانية، وما تنحذف بياناتك.
- الاشتراك من تطبيق الآيفون: يكون بالدفع حق أبل من حساب أبل حقك، ويتجدد تلقائياً كل سنة بنفس السعر إلا لو ألغيته قبل نهاية المدة بـ24 ساعة على الأقل. تقدر تلغيه أو تديره من إعدادات حساب أبل (الإعدادات ← اسمك ← الاشتراكات)، وطلبات استرجاع المبلغ تكون عن طريق أبل.
- شخص من أهلك: مشترك إيليت يقدر يضيف معه شخص واحد من أهله من الدرجة الأولى (زوج أو زوجة، ابن أو بنت، أب أو أم، أخ أو أخت). القرابة إقرار من المشترك، ونقدر نلغي الربط لو بان إنه مو كذا أو فيه استغلال. المنضم ياخذ الاشتراك طول ما اشتراك صاحبه شغّال، ويقدر أي واحد منهم يفك الربط متى ما بغى. كل واحد يقدر يسجل تذكيرات للثاني، وهو مسؤول عن اللي يسجله.
- المستندات: التذكير بانتهاء المستندات وخطوات التجديد للمساعدة بس، والتجديد نفسه مسؤوليتك عن طريق الجهات الرسمية.
المؤسسات والشركات: السعر حسب احتياج كل مشروع، ونعطيك العرض بعد ما نفهم شغلك. ما فيه تجربة مجانية، ونختبر فزعة مع صاحب المشروع قبل ما يبدأ يرد على العملاء. تفاصيل التجهيز ووش نحتاج منك في شروط التأسيس.
الأسعار ممكن تتغير، وأي تغيير ما يأثر على مدة دفعتها قبل.
إيقاف الخدمة
تقدر توقف استخدام فزعة وتحذف بياناتك بأي وقت. ونقدر نوقف أي حساب يخالف هذي الشروط.
الأنظمة
تخضع هذي الشروط لأنظمة المملكة العربية السعودية.